[rtl]وصفة رائعة لطريقة تحضير الشباكية في الفرن ، تاتجي بنينة وصحية واللي ذاقها مكيعرهش أنها طيبة غي في الفرن مشي مقلية. عجباتني ونقلتها ليكوم من واحد الموقع [/rtl]
[rtl]شخصيا أنصح بها خصوصا للناس اللي ماتيبفيوش القلي ، وهاد الشباكية في الفرن سهلة والمقادير واضحة وان شاء الله تنال اعجابكن جاراتي[/rtl]
[rtl]وصفة الشباكية بدون قلي منقولة من الأخت وفية أم عمارة جزاها الله خيرا[/rtl]
[rtl]هاد الشباكية في الفرن كتبغي المقادير بزايد باش تجي هشيشة[/rtl]
[rtl]مقادير الشباكية في الفرن[/rtl]
[rtl]
[/rtl] [rtl]500 غرام دقيق
زلافة متوسطة زنجلان مكلي شويا ومطحون. ( يمكن تعملي حتى اللوز مطحون )
كاس شاي خليط زبدة وزيت.
2 معالق كبار خليط النافع وحبة حلاوة.
2 معالق كبار خل. نصف معلقة صغيرة خميرة معجونة. معلقة صغيرة خرقوم بلدي مطحون .
1 بيضة. 2 خميرة الحلوى.
ماء الزهر للعجين.[/rtl]
[rtl]طريقة عمل الشباكية في الفرن[/rtl]
[rtl]خلطي جميع المقادير وجمعيها بالزهر[/rtl]
[rtl]خلي العجينة مرخوفة[/rtl]
[rtl]دلكيها مزيان[/rtl]
[rtl]من بعد ما ترتاح طلقيها وشبكيها بحال العادة غير خليها غليضة شويا مع الطياب كتجي هي هاديك[/rtl]
[rtl]ستفيها فطاوة مدهونة وطيبيها بحال اي حلوة وما تخليهاش تتلون[/rtl]
[rtl]مباشرة من الفرن رميها فالعسل قطريها ورشي الزنجلان[/rtl]
[rtl]اليوم الاول كتكون مكرملة وفالغد كتصبح هشيشة وغزالة[/rtl]
[rtl]ولي كلاها كتعجبو وما كيعرفش انها طايبة فالفران[/rtl]
[rtl]كانت هذه طريقة عمل شباكية فالفران[/rtl]
[rtl]بالصحة والعافية[/rtl]
