كتاب حياتي

شحال هاز على كتافي
من القوافي
شفت الحفى و القهرة
والخبز حافي
شفت النهار
والليل ظلام
و الضوء طافي
شفت الخواض
و الصفى
والعوافي
بلا عوافي
الكثير فينا مخصوص
والقليل فينا كافي
قبلنا ورضينا
على القبيحة والزوينة
من نهار خلاقينا
مرضنا و برينا
هزمنا وتهزمنا
والدنيا كتدور بينا
طوال أو قصار العمر
آش سوينا
والصلاة على نبينا
قلعت السفينة
آش بيدينا
بعنا وشرينا
شربنا وكلينا
لبسنا وتعرينا
قنعنا و شبعنا
مابقات غبينة
حتى إلى مشينا
قولوها فينا غير زو ينة
ما نصبنا عليكم ما غشينا
درنا اللي علينا
ما تخلينا
جرينا وجارينا
حتى عيينا
قلعت السفينة
الله يكون بينا