سكنى

سولت راسي واش  أنا ساكن زعمــا
لعجب يا صاحبي
والسكنى ما هي سكنى
نهار طليت
لخشب رشى
والقصدير دندن
ولمرايا فضحات
والعين دمعات دمعة
نهار تخبل ليزار
المخدة ما هي فخير
وطاحت الظلمة
الظلمة
لون فقلوب الحكَرة
حجاية اللي يفهم سر المعنى
وحتى الشمعة يا صاحبي
دابت وطفات
والسرجم حيط
فوقو  موكا
حاضياها همزة
الكَنفود يضحك
والديب فالدورة تابع السربة
 
سولني واحد واش أنا قاري
وبدا يشرح ويراري
راه لحساب كيبدي بالربعة
ويسالي بالغمزة
الغمزة واقيلا حفرة
ولا جرات من ديك الجرة
بانت. بانت
هناك مور الحيط
سهرة جارية صفرة
بانت دوخه
فضيحة
كتلعب غميضة
فالجنان
وهناك فوق السطيحة
والكيسان فراجة طاجة
واحد عامر وعشرة بلاش
بين الدروبا يلعبو كاشكاش
 
وكل ليلة نشعل لفتيلة
نقلب ليها على هدية جميلة
كتغضب
كنغضب
ونسافر فحلام الشوق
والحكاية يا صاحبي
مازالا طويلة
هي حجاب
علقتو
شربت مدادو
وكتبت لقصيدة
نحكيها للغادي
للماجي
وللطير الشادي
قصة جديدة
الطير ؟؟؟
الطير طار يا صاحبي
كتبتو لقصايدي عنوان
حرف من لحروف
بيه النادي
خوفي عليك يا راسي
واش عقتي ولا مازال
ومازال
مازال السؤال يحير البال
بين السؤال والجواب ... تلفات لحروف
وكل حرف يلغي بلغاه ... واللغى لوان وهتوف
يا الرسام وشم... ولا تحلف حلوف
ويا الغادي سافر ... مكانك معروف
الحرف اللي البستي... جاه الخوف
والخوف عذاب ...شنق الجوف
والجوف معدن... عبارو عين تشوف
آش تشوف ؟
       
اصفر خاتر... نيفو سايل دامع
واحمر بين الدروبا... دمو شايع
واكحل مخدوع ... غل فالقلب الجايع
لزرق ما جاري... حوتو مرهون راكع
ولخضر زيتون
يا سلام ..فينك يا لحمام الضايع
لبيض بيضة ... طاسها قانع شابع
بين السؤال والجواب ... تلفات لحروف
وكل حرف يلغي بلغاه ... واللغى لوان وهتوف
خوفي عليك ياراسي
كَالوا لي سوقك سوق خاوي

لك تحية
مالك تقلب على السكنى وانت ساكن
راه ليك في القلب قنت منا وبيك يدندن
مالك تايه في العرصة
وجنان منا يكون
منا كرمة منا
منا ملحة لفنون

مالك تايه في لكلام
تقلب عل المكان
راه مكانك عندنا فينا
درتي بيبان
سلم قلمك المبدع اخي هكار التزي

واسمح لي على طول لساني راني نقددو ونشرو على خيوط الشمس
نفلحوا بمداد النخوة
ونرسم ليك
سطر
بخرقة المعاني

شكرا لك الأخ حمان
مرورك من هنا أسعدني

مالك تقلب على السكنى وانت ساكن
راه ليك في القلب قنت منا وبيك يدندن
مالك تايه في العرصة
وجنان منا يكون
منا كرمة منا
منا ملحة لفنون

سلم اليمين وسلم اليراع  اخي الفاضل ادريس سررت بمعانقة حرفك  الشفيف