وقْتَاش تْعفُّو

وقْتَاش تْعفُّو

*******

وَقْتاش تْعَفُّو
ضْبرتُونا
وْمازَال فِينًا تْنتْفُو
شْنقْتُونا
وْما بْغيتُو تْرخْفُو
قْهَرتُونَا
وْما نْويتُو تْعَطْفُو
ازّمَتُّونَا
اللِّي جْهَرْ بْ همُّو
رَعْرعْ بْ فمُّو
واللِّي قلْمُو سَطَّرْ حَرفُو
زْطَمْتُو ليهْ عْلى جَوْفُو
حَرْف بْ حرْف عْليه اطُّوفُو
نْسِيت لَبْنِي بَاقِي جْدِيد
مَازال فْ طُورْ التّشْيِيدْ
وْبَاشْ يَتْوطَّدْ وْيصْمَدْ
خَصُّو يْكُونْ زايَدْ حْدِيد
وَالرِّيح قْبل هْيَاجْها تَهْمَد
وَقْتاش تْعَفُّو
شْحَال وحْنَايا شادِّين الصَّفّْ
تْسًوَّقْنَا حُرِّيَّة بْ سْقَفْ
دِيرْمَابْغِيتِي وعْرَفْ تَهْضَر
فْتحْ عِينيكْ فَ الضُّو لَحْمَر
يمْكن تَجْذَب وْتتْحيّر
تْعرَّا يْلا بْغِيتِي وَاتَّسْتَر
وَفْ قَلْبَك غيَّرْ لْمُنْكَر
اصْبرْ لَزْيَادَة لْ أَسْعَارْ
لاتَنْعَتْشِي لْواحَد شَفَّارْ
كُنْ صبَّار فْحَا لَّحْمَار
وَحْضي لْسَانَك لايَتْعتَّر
ماكَايَنْ ماسْهَل منْ مَحْضَرْ
وْهانْت مهْزُوزْ فِينْ تتْغبَّرْ
وَقْتاش تْعَفُّو
وَعْلى لَكْراسَا مَا تتْنَاتْفُو
بْحُورنا نشْفُو
خْواوْ مَ لّْحُوتْ
والنَّاسْ مَازَالَة فِيهْ كتْمُوتْ
فهّْمُونَا عْلاشْ آالْخُوتْ
وآشْ مَامنْ حقّْنَاش نْعَرْفُو ؟
لْقلبْ طاب وْطابْ حتَّى لْقاعْ
بَ التَّخْمَام وْلگْعَادْ
لْبزْطَام جَاعْ
وْباضْ فِيهْ لگْرَادْ
لَگْدَمْ اتّْشَقّْ طَالَعْ هَوَّادْ
والشّْبابِْ ادَّاهْ لْوَادْ
بْلادْ وَآشْ منْ بْلاَد
فِيهَا حدَّادْ
وَبَّارْدِي
وشْحَال منْ بَانْضِي
رْجَانا فَ اللهْ آولْدِي
اتّْفُو
يْلاَ مَا بْغِيتُو تْعَفَّو
نعْطيوْكُومْ سْلاَمْ وَنْگَرْضْفُو

*************
المريني ادريس
القصر الكبير بتاريخ : 25 / 09 / 2013

لعفو يا مولانا لعفو

من هم التسعيرة ف لخميرة

ومن لحمار لي شد لينا عبار

ولى برلماني ودار دار

وحنا واحلين ف زيادة كوميرا

والعفو يا مولانا لعفو

واش نشتفوا ولا نهتفوا

ب ويلنا لي هازو حمار وكرفطو

لحمار لي قلنا راه فاتو اتاريخ .

ولا شعارنا ف لحكومة والترشيح

هاذ العام راه نصوتو عل حمار

كيف ما صوتنا عل جمل وركدناه

راه جابوحمار تبنيناه

يسوكنا وحنا وراه

الله يكون ف عون الجيل الجديد

واخا حنا راه هزينا لبردعة والحديد

ما دوينا ما غوتنا

عل حوايج لعيد

سلكنا بلي خلى لاول لتاني

وكلنا راه تاع خوايا لوحداني

وعشنا ف كفيفة براني

واخا ف بلادي

اعتذر اخي المريني اذا اضفت هذه الاضافة

سطور معبرة من قلب متاتر بالاوضاع الحالية سلمت وسلم قلمك اخي المريني

شكرا على هكذا ابداع المميزين حفظكما الله واش تعلموني شوية ديال الزجل ؟

شكرا لك اختي

.

.الشكر للاخ ادريس المريني

االلي جر لساني وخلاني نكر

تحيتي

تبارك الله على سي ادريس المريني لي جر لسان السعدية وخلاها تهدر وتزجل