شكون انا

موضوع: شكون انا الثلاثاء سبتمبر 10, 2013 12:52 pm

شكون انا

انا بلية مجلية ف سما
دايرة كبة معزبة ف لما
جامعة حيش وريش
وساقية لحشيش
وتدي وتجي ف لخيوط
وتعمر لكفا
وطالبا لولفا

شكون انا

انا لموج اضارب من بعيد
جاب الشجر
وجامع لحجر
طوب وصخر
ويتنهد ويكفر
وتنوض علة
دايرة ظلة
فوق اسحاب
وتمشط لضباب
بحروف رجليها

شكون انا

انا لفريك
لي جا ونسى
سميتو من دوا
قرا وتقرا
من كثرة لهضرة
سمح ف لوطا
وعبََََّشْ ف لعلا
جابو لترابو
منو تروى
شكون انا
انا ارضى لمرشي
بغا كلشي
ونْطَحْ بكرون
لويل
وشرب عيب طويل
دار عينين
ورجلين
وكمل بطراف ازمان
وحام عل لويدان
يجَغَََّمْ بلعرام
كلام
وحصيصة عام
ودام
عفنو ف راسو
يدور ف عينيه
ودايب ف كاسو

شكون انا

انا لحيا
لي قراو عليه
لوالة في كتاب وتصدّا
نيت ف كاعة وكدا
ترش بدموع لويل
قطع من كمو
يستر همو
وشكى
وبكى
عل نجوم
وخوى سراب لهم
ف حلاب عدم
يحز
ويكمد
ودار حجاب حديد
ف ربيع كبة جديد
وبنى قبة
ببياض ثلج
وعلق علام
من زجاج مغمام
بجميع لوان
نشر وراقو
ف ظلام الليل
وسرح ف طريق
لي داتو وجاتو
راه لخيط طويل
ولحيا سارح
ما جا
ومانجا
من
عديانو
حلفو يجروه
يغطسوه
ف رماد فازك
عيا ما يزاوك
لا كبدة مفرشة
ولا قلب هشا
لي رشا
ودار نقشة
ف خرزة لودن
ويتباهى
راه لويل معشش
غاس وما طلع
من كف لسكع
تفرش وركع
وتاه ف جنان ضبع

شكون انا

انا لكلمة
طالقة جوانحها
ف فراش الارض
بخيوط محبكة
واشمة نجمة
بين عينيها
جمعت لوقفة
وهزت قراب اساعة
تعلم لكبار واصغار
حروف مدمعة
وحلو ف ادلو
مدلي ف بير عامر وتكوى
جات تتنفسو
هاج وتخوى
وبقى يَكرْ
عل لي سكنو وراحو
وحشهم ف قاعو ما زاحو
رشى وهشى
سلم ساروت لعشة
ومشى
فين مشاو لي سبقونا
مازال ف الجرة
ما يتقال

لقصيدة عندها تتمة .........ان شاء الله تعجبكم

السعدية الفاتحي........ام زين ...............30/غشت 2013

موضوع: رد: شكون انا الثلاثاء سبتمبر 10, 2013 1:05 pm

تبارك الله عليك تبارك الله عليك
الله يعطيك الصحة

موضوع: رد: شكون انا الإثنين سبتمبر 16, 2013 9:52 am

زجلية متميزة مزيد من التالق اختي السعدية مودتي

موضوع: رد: شكون انا الإثنين سبتمبر 16, 2013 11:41 am

سررت بقراءة الزجلية الجميلة وما سرني اكثر وراقني هو رد زجالة على زجالة وتثمين عمليهما ادام الله عليكما وده ونعمته