لقبيلة المغبونة

تسولوا وتقولوا شكون انا
انا بنت لقبيلة المغبونة
ترفض لغرام
وتقمع شعور المحبوبة

ياسيادي
واش لغرام عيب وحرام?????
ولا فقبيلتي
يحللوا وحرموا لي بغاو

تحديث لقبيلة
وبغيت نجرب لغرام
بغيت نعيش
ونعوم بين مواج

نزل عليا القدر
ودق قلبي بلا مايشاورني
فداك النهار

عشقت ذاك الصياد
لي كل يوم يحوم ويتجول بشاطئ الامان

مع طلوع النجمة
نخرج نتسلت من خيمتي
ونقز بين لوتاد
ومايتسمع ليا حس
ولايبان ليا اثار

نكلس حدى كدية الرمل
ونتمتع بشوفت الصياد
مايهمني حكام ولا قصاص
همي نشوف ونرتاح

كل يوم على هاد الحال
نخرج وندخل بلا حس ولا اثار

فواحد النهار هاجت عليا مواج لغرام
ومابقيت عاملة لحد اعتبار
وزعمت شوية
وقربت للصياد
شفت فيه وشاف فيا
ضحكت ليه وضحك ليا
ورجعت نجري لخيمتي
انااااري على الخوف الساكن فينا

وماحشمت
رجعت تاني يوم نتسنى الصياد
وبقينا على هاد الحال يام ويام

بغيت نعطي للصياد هدية
وحيت قبيلتي خالية من الورد والنوار
مابان قدامي غير حزمة فجل حمراء منورة المكان
هديتها ليه
وفرح بيها
احترت معاااه
ياااه على ولد لهبيلة!!!!!!
عجبات حزمة لفجل وبيها فرحان
واش لغرام يبين كلشي مزيان????
ولا الصياد فرح بيها باش يفرحني معاه?????
ولاباش مايصدمنيش حيت انا اتحديت لقبيلة
وخرجت طوع الاجداد

او واحد النهار غاب الصياد
حيت قبيلتي منعات لغراب
ياكما حسوا بلي لغرام خيسكن لقبيلة?????

تمنيت كل وحدة فينا
تعيش لغرام
تمنيت نكون يد وحدة
ونقول هذا حقنا في الحياة

كانت قصتي زوينة
واخة مضركة
ماباين ليها عنوان

الحب ياسيادي
نعمة من عند الله
ماتولدش غير للرجال
هو لينا كيما ليهم
منى الاكحل

زجلية تتميز بالكشف عن المسكوت عنه وثورة المرأة على ما يعرفه المجتمع العربي من قمع العنصر النسوي حتى لايعبر عن مشاعره واحاسيسه والفاظها تمتح من لغتنا البيضاء
موفقة اختنا الفااضلة منى ان شاء الله

اسعدني تواجدك غاليتي
ويشرفني حرفك الراق بين حروفي
تقديري لشخصك الكريم

شكرا على هذا الابداع ومزيدا من الالق