25/03/2013
22H07
آخر أيامي
وليت خائن ..
وليت غدار ..
شفار وسمسار ..
خدام فجوطية النخاسة ..
ما نبيع ما نشري ..
ما نرهن ..ما نكري ..
ديما تالف ..
دايخ ..سكران ..
نشرب بلا قياس ..
نشرب ألف قصيدة فطاسة ..
وما نتزعزع من البلاصة ..
رضيت بالهم ..
ردني حاشاكم بركاسة ...
تغالطت ليه مع كثرة البلحاسة ..
ما عرفش معدني ..
ذهب ..جوهر ..
وألف ماسة ..
نقرة تغمر كل نحاسة ..
نحن ونعطف..
على كل مهموم ..
مضروب بالظلم ..قرطاسة ..
تخلطات العرارم فهاد الجوطية ..
وكثرت عليا السياسة ..
حتى ولى ..
اللي حنيت فيه ..
عاونتو ..
أولا غير تلفت ليه ..
بيني وبينو ..
مغامرة .. حكاية ..
قصارى .. دسارة ..
ولا .. وناسة ..
جوطية مخلطة مجلطة ..
فيها القديم والجديد ..
والدربالة والحلاسة ..
يدور فيها الزمان والفلوس
و تتقلب فيها النفوس ..
ما بين الزيادة والنقوص ...
الإيباري والمقوص ..
الخياطة واللباسة ..
الطبا والبزناسة ..
الشواش وصحاب الكراسى ..
الشفارة والعساسة ..
كلشي معلم .. مطور ..حجا ..
حاضي ..
شايطة فيه الكياسة ..
خايف على راسو من دقة القواسة
هدي سوق النخاسة ..
كلشي فيها يدور فالبلاصة ..
المصلحة .. القهيوة .. اللهاسة ..
العرارم د الدواصة ..
وأنا حالي ديما مبهدل ..
فيا الدوخة والهلوسة ..
ماني من هادو ماني من هدوك ..
ماني من شلوح ماني من فاسة ..
ماني من جبالة ماني من سواسة ..
ماني من قياد ماني من خماسة ..
والله يلاغير مودر فجوطية النخاسة ..
أحمد عبد الغني
