أنـــــــــا والزمان /زجل/

اللي فات فات واللي فات ما نحصيه ما نعدُّو

اللي مات مات واللي مات ما حد فينا يردُّو

اللي جات ساعةُ راحل ماخلقتُ باش نشدُّو

اللي باقي عايش معايا ما نكرهُ ولا نعاديه
*******************************

نوقف بجنبو فالضيق وفالحزة ناخذ بيدُّو

نواسيه فساعة الأحزان ونمسح دموع خدُّو

ونفرج عليه الى الأبواب والمنافد عليه تسدُّو

نجيب شموع عيني ونضوي بيها ظلام عينيه
*********************************

أنا عارف نفسي ندير الخير ونلقى ضدُّو

الخير بالخير الناس اليوم ما بقات قدُّو

شكون مازال يورث الشهامة على بوه وجدُّو

يقولو الزمان غريب والزمان احنا اماليه
**********************************

يدي فوق ما ناكل فتات الخبز والعظم ما نكدُّو

ما نحرم مسكين ومن نعمة ربي نعطيه ونمدُّو

ما نجالس غني جاهل عاجبومالو وجهدو

بعيني نميز الناس ونميز الواطي من عاليه
********************************

ما نبني برج بالحرام غدا الريح تهدُّو

غير كوخ صغير بالحلال نشكر خالقي ونحمدو

يرزقني فيه عشيرصادق ما يخالف وعدو

ما يتغر بفتون الدنيا ما يتقلب على اماليه....
******************************

حميد يعقوبي ...لشعراء الفردوس المفقود