يا نيل مصر

مهما نقول يا وطن
حب الوطن غالى
مهما نبعد أرواحنا
بتلالى
حب الوطن عقيده
زرعها أجدادى
يا نيل مصر إروى شعبها
من تانى
علمهم معنى الوطن
دا الوطن طول عمره غالى
إروى نفوسنا
طهر قلوبنا
دا مهما نبعد عن مصر
بتشدنا تانى
يا نيل
إروى صحارى القلب
خلى الزرع يكبر
وطن أجدادى عمره ما يدبل
بتفوت علينا المحن وتعدى
وإن طال بينا الزمن وغابت
شمس بلادى
بيظهر قمر يشق بنوره
عتمه الوادى
فاكرين 56
واستنزاف 67
وخط بارليف الحصين
وانتصار 73
يا بلادى يا حره
لسه الجرح عايش جوه
جوه جسد مسكين
اتفق عليه خاينين
يا نيل مصر إكتب معاناتك
عن وطن أحتضر
وقلوب بشر ساكنها الخوف
امتى تعود من تانى
تحب الوطن
وتغير على رمله
وتحضن ترابه من تانى
يلى بعتوا الوطن بالرخيص
تعالوا شوفوا
من أيام فرعون وخوفو
مين حكم مصر
ولسه عايش
مهما الصراع يزيد
الكرسى مش راح يفيد
زال من قبلهم سلاطين
وملوك ومش حاسين
ان مصر أمان ليوم الدين
يا نيل مصر إروى
دمانا
إجرى فِ حشانا
علمنا معنى الحياة
جوه تراب الوطن
القصه مش دستور
يحكم بلد
لا
القصه وطن جريح
مغلوب على أمره
شايف شعب مش همه
وطن جريح تقل همه
كترت مشاكله ولسه غرقان
فِ دمه
يا اه عدى حدودى
يا ألم أصرخ كمان
يا شعب بص وأتفرج
على نيل بلدى يبكى
حزين عليكِ يا مصر
وحزنى عليكِ أكبر
ضعتِ يا بلادى
والفتن جواكِ بتكبر
ومتأسلمين واقفين
عيزينها تولع
تورته واتوزعت بينهم
نسيوا إن مصر أكبر
وشعبها قادر ينصر الحق
ولو كان أخرس
بقلمى/ سيد منيرعطيه

شكرا جزيلا لك و بارك الله فيك

سلم بوحك، سلمت أناملك، سلم يراعك

تقديري الأخوي

**************